أحداث اللعبة تستكمل قصة الجزء السابق وهي بكل اختصار القضاء على شركاء البروفيدنس ولكن للأمانة خل نكون صريحين إن لعبة نفس هذي تكون القصة فيها مو مهمة، وإن أغلب اللاعبين يلعبونها لنظام اللعبة نفسها بالتسلل في القضاء على الأهداف عن طريق التخطيط والتخفي. اللعبة فيها ست مراحل في ست دول مختلفة وكل مرحلة فيها تفاصيل كثيرة ومصممة بعناية ودقة بشكل أغلب اللاعبين ما يتصورونه. اللعبة تعطي اللاعب الحرية المطلقة في طريقة إنهاء مهمته سواء عن طريق قتل الشخص المطلوب بشكل مباشر أو بطرق إبداعية اخرى وتحتوي على عدد كبير من التحديات لكل مرحلة تجعل اللعب أكثر حماس ومتعة ولكن في نفس الوقت أغلب التحديات متعارضة وتتطلب إنك تعيد المرحلة أكثر من مرة وهذا الشي ممكن يملل الكثير من اللاعبين ولكن في نقطتين جدا مهمين. النقطة الأولى إنك تقدر تحفظ توصيلك مباشرة قبل لا تخلص أحد التحديات وبعد ما تخلص ترجع وتكمل واللعبة تسمح إنك تسوي هالحركة والنقطة الثانية إن على الرغم من كثرة التكرار وحفظك للمرحلة بعد فترة إلا أنك ما تحس بالملل لأن اللعبة تعطيك خيارات كثيرة ومتعددة وأسلوب اللعب فيها جدا ممتع. طبعا كلاعب مو مجبور إنك تخلص تحديات اللعبة وتقدر تنهي اللعبة بالطريقة اللي تبيها وما راح تطول معاك ثمان ساعات تقريبا ولكن شخصيا ما أشوف أن هذي فكرة اللعبة ولا سعر اللعبة يسوى عليها إذا إنت حاب تلعبها من دون لا تنهي أغلب تحدياتها. من ناحية الصعوبة اللعبة تسمحلك إنك تختار الصعوبة اللي تبينها وتقدر تخلص كل شي فيها على أسهل صعوبة لكن لتجرب ممتعة أنصحكم تلعبونها على الصعوبة المتوسطة. طريقة اللعب ما عليها أي كلام واللعبة تعطيك خيارات كثيرة ومتنوعة وقصصها الجانبية في كل مرحلة مختلفة. الأصوات والمؤثرات الصوتية واضحة وممتازة والتصوير جدا جميل ودقيق. أقدر أقول إن اللعبة من الألعاب اللي نجحت في تسويق نفسها وإعطاء اللاعب التجربة الفعلية اللي يبحث عنها في هذا النوع من الألعاب. بكل اختصار مطورين اللعبة أخذوا أغلب ملاحظات اللاعبين على الأجزاء السابقة وعدلوها في هذا الجزء من اللعبة. هذا الكلام مو معناته إن اللعبة ما عليها أي ملاحظات. الشي اللي كنت أتمناه إن عدد التحديات يقل في كل مرحلة وبالمقابل تزيد عدد المراحل باللعبة. بالنهاية اللعبة قدمت تجربة فريدة في هذا النظام من الألعاب.
من الآخر:
1- مراحل اللعبة الستة تحتوي على تفاصيل كثيرة ومصممة بعناية ودقة بشكل الكثير من اللاعبين ما يتصورونه.
2- عدد كبير من التحديات والمهام في كل مرحلة والي تجعل اللعب أكثر حماس ومتعة كما إن أسلوب اللعب ممتع لكثرة الخيارات وتعددها.
3- نجاح اللعبة في إعطاء الاعب التجربة الفعلية لنظام التسلل والتخفي بهذا النظام من الألعاب.
4- كثرة التحديات في كل مرحلة وقله عدد المراحل يدفع إلى كثرة تكرار نفس المهام ولكن بأساليب مختلفة.